Այսօր, 56 տարեկան հասակում ենթաստամոքսային գեղձի քաղցկեղից մահացել է Apple ընկերության հիմնադիր Սթիվ Ջոբսը. տեղեկացնում է Associated press գործակալությունը: Apple-ի տարածած հաղորդագրության մեջ նշվում է, որ աշխարհը կորցրեց մի հանճարեղ և հրաշալի մարդու, իսկ այն մարդիկ, ում բախտ էր վիճակվել անձամբ ճանաչել Սթիվին, կորցրեցին ընկերոջ և ուսուցչի։ Ի դեպ, շուտով լույս կտեսնի Ջոբսի կենսագրությունը` «Steve: The Book of Jobs» վերնագրով։ Հիշեցնենք, որ Ջոբսին դաստիարակել է հայուհի Կլարա Հակոբյանը, եւ նրա կենսագրի խոսքերով` Սթիվը վարժ տիրապետում էր հայերենին: Այդ մասին` Apple ընկերության ղեկավար Սթիվ Ջոբսի մայրը հայուհի է. գրում է թուրքական Zaman օրաթերթը: Սիլիկոնային հովտի լեգենդի կենսագրական գրքում, որը լույս է ընծայվելու նոյեմբերին, պատմվում է, որ կինը, որը նրան մեծացրել է, Թուրքիայի Մալաթիա գավառից Հայոց ցեղասպանության ժամանակ ԱՄՆ գաղթած հայկական ընտանիքից է: Սթիվին դեռեւս մանուկ հասակում որդեգրել եւ դաստիարակել են Կլարա (օրիորդական ազգանունը` Հակոբյան) եւ Փոլ Ջոբսերը:
Facebook սոցիալական ցանցի հիմնադիր Մարկ Զաքերբերգն իր երախտագիտությունն է հայտնել այս գիշեր մահացած` Apple ընկերության հիմնադիր Սթիվ Ջոբսին. - Սթի'վ, շնորհակալ եմ քեզ, որ դու ուսուցիչ էիր եւ ընկեր: Շնորհակալ եմ, որ դու ցույց տվեցիր, թե ինչ ես անում, եւ որ քո այդ գործը կարող է աշխարհը փոխել: Ես քո կարիքը շատ եմ զգալու,- ֆեյսբուքյան իր էջում գրել է Զաքերբերգը: Ըստ Reuters-ի` Ջոբսի մահվան մասին իր բլոգում գրել է Microsoft ընկերության տնօրենների խորհրդի անդամ Բիլ Գեյթսը. - Նա, ով աշխատել է Սթիվի հետ, մեծ պատիվ է ունեցել: Հաճախ չես հանդիպում այնպիսի մարդկանց, ովքեր այդպես նկատելիորեն փոխում են աշխարհը, ինչպես արեց Սթիվը: Եվ այդ փոփոխությունը կզգան նոր սերունդները: Ես ու Սթիվը ծանոթացել ենք 30 տարի առաջ, մենք գործընկերներ էինք, մրցակիցներ եւ ընկերներ: Սթիվ Ջոբսի մահվան կապակցությամբ հատուկ հայտարարություն է արել նաև ԱՄՆ նախագահ Բարաք Օբաման. - Սթիվը ամերիկացի մեծ նորարարների շարքն է դասվում: Նա բավականին քաջ էր` չմտածելու համար այնպես, ինչպես մյուսները, բավականին հաստատակամ` հավատալու համար, որ կարող է փոխել աշխարհը և բավականին շնորհալի` դա անելու համար:
|
